ЖТП КРде Bishkek Physics Cup 2026 физика олимпиадасы өттү

24–25-октябрда Бишкек шаарында 7–12-класстын окуучулары үчүн физика боюнча эки күндүк олимпиада өттү. Программа физикалык маселелерди чыгаруу боюнча мелдештерди жана ракета технологияларына арналган билим берүү иш-чараларын камтыды.

Бишкек, 2026-жылдын 29-октябры. Кыргыз Республикасынын Жогорку технологиялар паркында (ЖТП КР) так илимдерге кызыккан, билимин жана жөндөмдөрүн өнүктүрүүгө умтулган мектеп окуучуларынын башын бириктирген Bishkek Physics Cup 2026 физика олимпиадасы өттү.

24–25-октябрда өткөн иш-чара интеллектуалдык таймаш, тажрыйба алмашуу жана физикага кызыккан жаштардын өз ара баарлашуусу үчүн аянтча болду. Эки күндүн ичинде катышуучулар ар кандай татаалдыктагы олимпиадалык маселелерди чыгарып, билимдерин сынап, аналитикалык ой жүгүртүү жана стандарттуу эмес маселелерди чечүү жөндөмдөрүн көрсөтүштү.

Мелдештерден тышкары, олимпиаданын алкагында Astro Community коомчулугунун өкүлдөрү «Ракета алып жүрүүчүлөрдүн кыймылдаткычтарынын негизги түрлөрү» деген темада лекция жана мастер-класс өткөрүштү. Катышуучулар ракета кыймылдаткычтарынын иштөө принциптери, алардын түрлөрү жана заманбап космостук техникада колдонулушу тууралуу маалымат алышты.

Bishkek Physics Cup 2026 олимпиадасынын өткөрүлүшү мектеп окуучуларынын арасында физика илимин жайылтууга, илимий-техникалык багыттарга кызыгууну арттырууга жана илим жаатындагы билимин тереңдетүүгө умтулган жаштардын коомчулугун калыптандырууга өбөлгө түздү.

Кыргыз Республикасынын Жогорку технологиялар паркы жаштардын интеллектуалдык дараметин өнүктүрүүгө, ошондой эле илим жана технология тармагындагы келечектеги адистердин кесиптик өсүшүнө шарт түзүүгө багытталган билим берүү жана илимий-технологиялык демилгелерди колдоону улантууда.