Купуялык саясаты

Кыргыз Республикасынын Жогорку технологиялар паркы

1. Жалпы жоболор

1.1. Ушул Купуялык саясаты (мындан ары - «Саясат») «Кыргыз Республикасынын Жогорку технологиялар паркынын дирекциясы» мекемесинин (мындан ары - «ЖТП дирекциясы») расмий сайтын жана маалыматтык системаларын колдонууда колдонуучулар (мындан ары - «Колдонуучу») тарабынан берилген персоналдык маалыматтарды жана башка маалыматтарды чогултуу, иштеп чыгуу, сактоо, өткөрүп берүү жана коргоо тартибин аныктайт.

1.2. Ушул Саясат ЖТП дирекциясы тарабынан Сайтты жана маалыматтык системаларды колдонуу учурунда алынган бардык маалыматтарга, анын ичинде ЖТП резиденти катары катталуу үчүн өтүнмө берүүгө, ошондой эле Колдонуучу менен кийинки өз ара аракеттенүүгө карата колдонулат.

1.3. Персоналдык маалыматтарды иштеп чыгуу Кыргыз Республикасынын мыйзамдарына, анын ичинде «Кыргыз Республикасынын Жогорку технологиялар паркы жөнүндө» Кыргыз Республикасынын Мыйзамына, Кыргыз Республикасынын Санариптик кодексине, ошондой эле башка ченемдик укуктук актыларга ылайык жүргүзүлөт.

1.4. Сайтты колдонуу жана (же) өтүнмө берүү Колдонуучу ушул Саясат менен таанышканын жана анын шарттарына макул экенин билдирет.

2. Иштелип чыгуучу маалыматтардын курамы

2.1. ЖТП дирекциясы төмөнкү категориядагы маалыматтарды иштеп чыгат:

Идентификациялык жана каттоо маалыматтары:

юридикалык жактын аталышы / жеке ишкердин аты-жөнү;
каттоо жана уюштуруу документтери;
уюштуруучулар, катышуучулар (акционерлер), бенефициардык ээлер жөнүндө маалыматтар;
байланыш маалыматтары (телефон номери, электрондук почта дареги).

Каттоо үчүн берилүүчү документтер жана маалыматтар:

бизнес-план;
финансылык жана бухгалтердик документтер;
ЖТП жөнүндө мыйзамдарда каралган башка документтер.

Техникалык маалыматтар:

IP-дарек;
cookies файлдарынын маалыматтары;
түзмөк, браузер жана операциялык система жөнүндө маалыматтар;
кирүү күнү жана убактысы;
Колдонуучунун маалыматтык системадагы аракеттери жөнүндө маалыматтар.

2.2. Техникалык маалыматтар Сайттын иштешин камсыз кылуу, маалыматтык коопсуздук, Колдонуучунун аракеттерин каттоо жана укукка каршы аракеттердин алдын алуу максатында иштелип чыгат.

2.3. ЖТП дирекциясы Кыргыз Республикасынын мыйзамдарында түздөн-түз каралган учурлардан тышкары, персоналдык маалыматтардын атайын категорияларын максаттуу түрдө чогултпайт.

3. Маалыматтарды иштеп чыгуунун максаттары

3.1. Персоналдык маалыматтар төмөнкү максаттарда гана иштелип чыгат:

ЖТП резиденти катары катталуу үчүн берилген өтүнмөнү кароо;
Эксперттик кеңеш тарабынан экспертиза жүргүзүү;
баштапкы каттоо же баш тартуу жөнүндө чечим кабыл алуу;
өтүнмөнү кароонун алкагында Колдонуучу менен өз ара аракеттенүү;
Сайттын жана маалыматтык системалардын иштешин, коопсуздугун жана туура иштөөсүн камсыз кылуу;
Колдонуучунун юридикалык мааниге ээ аракеттерин каттоо;
ЖТП резиденттеринин ишмердүүлүгүн эсепке алуу, мониторинг жүргүзүү жана талдоо;
Кыргыз Республикасынын мыйзамдарынын талаптарын аткаруу.

3.2. Маалыматтарды иштеп чыгуу ЖТПнын функциялары жана милдеттери менен байланышпаган максаттарда жүргүзүлбөйт, мыйзамдарда каралган учурлардан тышкары.

4. Маалыматтарды иштеп чыгуунун укуктук негиздери

4.1. Персоналдык маалыматтарды иштеп чыгуу төмөнкү негиздерде жүргүзүлөт:

Колдонуучунун Сайтты колдонуу жана өтүнмө берүү аркылуу билдирген макулдугу;
мыйзамдарда белгиленген ЖТП дирекциясынын функцияларын жана ыйгарым укуктарын аткаруу үчүн маалыматтарды иштеп чыгуунун зарылдыгы;
Кыргыз Республикасынын ченемдик укуктук актыларынын талаптары.

5. Маалыматтарды иштеп чыгуу жана өткөрүп берүү шарттары

5.1. ЖТП дирекциясы иштелип чыгуучу маалыматтардын купуялуулугун камсыз кылат жана аларды үчүнчү жактарга ачыкка чыгарбайт, төмөнкү учурлардан тышкары:

мамлекеттик органдарга - Кыргыз Республикасынын мыйзамдарында каралган учурларда жана тартипте;
ЖТП дирекциясынын ыйгарым укуктуу кызматкерлерине, алардын кызматтык милдеттеринин чегинде;
маалыматтык системалардын, анын ичинде IT-инфраструктуранын иштешин камсыз кылуучу подряддык уюмдарга, алар купуялуулук талаптарын сактаган шартта.

5.2. Маалыматтарды үчүнчү жактарга башка учурларда өткөрүп берүү Колдонуучунун макулдугу менен гана же Кыргыз Республикасынын Санариптик кодексинде түздөн-түз каралган учурларда жол берилет.

6. Маалыматтарды сактоо мөөнөттөрү

6.1. Персоналдык маалыматтар аларды иштеп чыгуунун максаттарына жетүү үчүн зарыл болгон мөөнөт ичинде, ошондой эле Кыргыз Республикасынын Санариптик кодексинде белгиленген мөөнөттөрдө сакталат.

6.2. Маалыматтар төмөнкү учурларда узагыраак сакталушу мүмкүн:

«Кыргыз Республикасынын Жогорку технологиялар паркы жөнүндө» мыйзамдардын талаптарын аткаруу үчүн;
ЖТП дирекциясынын укуктарын жана мыйзамдуу кызыкчылыктарын коргоо үчүн;
юридикалык мааниге ээ аракеттер боюнча далилдөө базасын камсыз кылуу үчүн.

7. Колдонуучунун укуктары

7.1. Колдонуучу төмөнкүлөргө укуктуу:

өзүнүн персоналдык маалыматтары жана аларды иштеп чыгуу тартиби жөнүндө маалымат алууга;
маалыматтарды тактоону, жаңыртууну же оңдоону талап кылууга;
мыйзамдарда каралган учурларда маалыматтарды иштеп чыгууну чектөөнү же токтотууну талап кылууга.

7.2. Колдонуучу персоналдык маалыматтарды иштеп чыгууга берген макулдугун ЖТП дирекциясынын дарегине жазуу жүзүндө же электрондук формада тиешелүү арыз жөнөтүү аркылуу кайтарып алууга укуктуу.

Макулдукту кайтарып алуу жол-жобосу аны берүү жол-жобосуна караганда оор болбошу керек.

Макулдукту кайтарып алуу, эгер мындай иштеп чыгуу Кыргыз Республикасынын мыйзамдарында каралган башка мыйзамдуу негиздерде жүргүзүлүп жатса, персоналдык маалыматтарды иштеп чыгуунун автоматтык түрдө токтотулушуна алып келбейт.

Эгер персоналдык маалыматтарды иштеп чыгуу өтүнмөнү кароо же ЖТП дирекциясынын функцияларын аткаруу үчүн зарыл болсо, макулдукту кайтарып алуу өтүнмөнү мындан ары кароонун мүмкүн болбой калышына же каттоодон баш тартууга алып келиши мүмкүн.

7.3. Укуктарды ишке ашыруу Кыргыз Республикасынын мыйзамдарында белгиленген тартипте жүргүзүлөт.

8. Маалыматтардын коопсуздугу

8.1. ЖТП дирекциясы персоналдык маалыматтарды коргоо үчүн зарыл жана жетиштүү уюштуруучулук жана техникалык чараларды көрөт, анын ичинде:

маалыматтарга жетүүнү чектөө;
маалыматты коргоо каражаттарын колдонуу;
системада колдонуучулардын жана кызматкерлердин аракеттерин эсепке алуу жана каттоо;
маалыматтарга уруксатсыз жетүүнүн, аларды өзгөртүүнүн, ачыкка чыгаруунун же жок кылуунун алдын алуу.

9. Cookies файлдарын жана техникалык каражаттарды колдонуу

9.1. ЖТП дирекциясы Сайттын иштешин камсыз кылуу, аны колдонууну талдоо жана система менен иштөөнүн ыңгайлуулугун жогорулатуу үчүн cookies файлдарын жана башка техникалык каражаттарды колдонушу мүмкүн.

9.2. Колдонуучу өзүнүн браузеринде cookies файлдарын колдонуу жөндөөлөрүн өзгөртүүгө укуктуу.

10. Саясатты өзгөртүү

10.1. ЖТП дирекциясы ушул Саясатка өзгөртүүлөрдү киргизүүгө укуктуу.

10.2. Саясаттын актуалдуу редакциясы Сайтта жайгаштырылат.

10.3. Өзгөртүүлөр киргизилгенден кийин Сайтты колдонууну улантуу Колдонуучунун Саясаттын жаңы редакциясына макулдугун билдирет.

11. Корутунду жоболор

11.1. Ушул Саясатка жана аны колдонууга байланыштуу келип чыккан мамилелерге Кыргыз Республикасынын мыйзамдары колдонулат.

11.2. Ушул Саясат жалпыга жеткиликтүү документ болуп саналат жана ЖТП дирекциясынын Сайтында жайгаштырылууга тийиш.